కేంద్ర అవార్డు గ్రహీత గుమ్మడి గోపాలకృష్ణకు సీఎం చంద్రబాబు అభినందనలు

ప్రముఖ రంగస్థల నటుడు, ఆంధ్రప్రదేశ్ నాటక అకాడమీ ఛైర్మన్ గుమ్మడి గోపాలకృష్ణను ముఖ్యమంత్రి చంద్రబాబు అభినందించారు. ప్రతిష్ఠాత్మక కేంద్ర సంగీత నాటక అకాడమీ అవార్డుకు ఇటీవల గోపాలకృష్ణ ఎంపికైన విషయం తెలిసిందే. ఈ నేపథ్యంలో మంగళవారం ఆయన అమరావతి సచివాలయంలో ముఖ్యమంత్రితో మర్యాదపూర్వకంగా సమావేశమయ్యారు.

ఈ సందర్భంగా గుమ్మడి గోపాలకృష్ణకు చంద్రబాబు హృదయపూర్వక శుభాకాంక్షలు తెలిపారు. రంగస్థల నటనకు తొలిసారిగా కేంద్ర సంగీత నాటక అకాడమీ పురస్కారం లభించడం చాలా సంతోషకరమని ముఖ్యమంత్రి హర్షం వ్యక్తం చేశారు. "గోపాలకృష్ణ ప్రదర్శించే నాటకాలు అన్నీ అద్భుతంగా ఉంటాయి. తన నటనతో తెలుగు నాటక రంగానికి జాతీయ స్థాయిలో గొప్ప గుర్తింపు తీసుకువచ్చారు" అని చంద్రబాబు కొనియాడారు.

గోపాలకృష్ణను శాలువాతో సత్కరించి, ఆయన భవిష్యత్ ప్రయత్నాలకు శుభాకాంక్షలు తెలిపారు. ఈ ఘనత సాధించడం ద్వారా తెలుగు కళారంగానికి గర్వకారణంగా నిలిచారని సీఎం ప్రశంసించారు.